Page 11 - Feux-d-holieres
P. 11
Rèpaûgni
L’cé qui n’è pont d’ahèt ni bécôp d’pus d’couradge,
Qui n’fât qu’bèrli-bèrloque ou à la hasquipouye,
Èt co souvèt à r’grèt, la moiti du s-n ouvradge,
Ç’ti-là qui s’croit trop fèl èt qui n’voit m’ qu’i s’fourbouye,
Qui n’fât qu’toûyi-broûyi,
Sés méme s’ a-n amâyi,
Est bin sûr quu s-n affaire n’a vèrè qu’a bèrdouye!
Pou r’cude des bèles mèchans, ç’ n’est m’ el tout d’ahènèr.
(Ç’n’est m’ les botrés d’djardrîe
Qui fant les grosses âries.)
Faût sôclèr les tchardrans èt dènâvèr les s’nès,
Pou ça, n’faût m’ rèpaûgni ses bras ni sa chueûr
Ca c’est bin ça la peûle èt, sés d’jette du preûnèr,
Gn’a-n è toudjous tamét’ qu’y ant trouvè l’bounheûr.
N’faût m’ tède à toutes les nasses èt râclèr les tèrans,
Ni fâre coumme les goulafes qui d’jant qu’aû lang d’la s’maine,
Vaût mieux in ban rouf-rouf quu chi p’tits roufirans...
N’faût m’ coûtèr les tchantrés èt s’fîr à leûs ranguénes.
Quand les sous sant gâgnis,
Ç’ n’est m’ pou les godayi :
C’est coumme pou les danrâyes, faût z’a wardèr d’la graine!
11
