Page 9 - Feux-d-holieres
P. 9
Gueûs’ries
Su les tch’mins d’avaû-là, dju m’tréne a clambotchant
Ca gn’è des maûhanteûx qui s’a v’nant chorinèr
T-aûtou d’mi, s’abusquant quand i v’lant m’calounèr
À côps d’mantes èt d’gueûs’ries, d’aû lon t’a s’acwayant!
Pardjè, dj’arous des l’tèps potchi pa d’zous m’sabot
Les glawines du vipére a tordant leûs gavians...
À ç’ t’heûre, pou rèdivèr, dju n’â pus d’aguillan
Èt m’ paûve viè cœûr sounne lu tchabot.
Bétes à l’affût
Pa t’ t’avaû-là, i-gn’è bramèt
D’vichôs catchis èt co d’prow’lets,
Adjoquès pa d’dès les houpîs,
Prêtes à brotchi des les pouill’trîes
Èt d’sacadgi tamétes couvâyes
A s’y mussant pa toutes les crâyes.
Dj’â co l’fusic mais dj’ n’â pus d’poûre :
An n’fât m’ mout âque aveu d’la boûrre !
Pa t’ t’avaû-là, pou s’dèbanèr
Gn’è co touplé d’wapes èt d’fônets
Qu’aveu leûs airs èt leûs zinzins
V’nant v’dèclissi d’leû noir veunin
Sés tchètoi èt sés orémus
Djusqu’à dant qu’i v’croyant réus’...
Pou dènâvè la maltoun’rîe,
Dj’ n’â pus d’tchesseûre à ma cordgîe!
9
